خضر عواركة: تصوري انا وانت متل ادم و حوا

تصوري انك معي
ويسرقنا الوقت...
ونكبر سوى ونتزاعل
بس من حلى قلبك
رغم قسوتي
تضلك معي

*******
بعرف انك مهما بعدتي
راح ترجعي
ما بيسرقك مني زمن جوعان
ولا راح يغرك بمالو... نهمان
ولا راح يبعدك أني انا ال عاشقك طفران

وبعرف ان زعلتي ووصلك خبر بعدها اني بغيبتك ضجران
بترجعي بالفكر قبل ما ب طلتك ترجعي
وبين الروح والجسد صوبي تتسابقي
تصوري..

**********
انت وانا وتالتنا السكر ب خمر الهوى
ويغمرنا السهر وتهمسي... ما في نوى
بحبك انا وان غبت بخاف يطيرني الهوى
واسكر انا من عيون سكرانة بدمع الغوى
وقلك بحبك أنا... وتبعدي عني؟
لا تتصوري.. ابعدك عني؟ لا تتصوري.

***********
تصوري...

تصوري انك لعمري قمر ضوا
وبوحدتي كنت الشمس
وقت الدني كانت طفلي وتوى
تصوري شو حلو
من قبل ما يولدو الناس
انا بجنتك ادم وانت الي حوا

********
تصوري انك معي وعم نحكى بالهمس
وقرب شوي ويغوينا اللمس
وفكفك غلال الي عم تحجبك
وتعميني الشمس

********
تصوري انك قمر سهران
والكون بشوفتك سكران
ومن كتر شوقي الك.. بردان
وتنزلي صوبي وقلك انا نعسان
وتحضنيني وبريحتك انقلب دفيان
.. وبالحدى عالهدا بقلبك تدفنيني

********

تصوري

تحلمي اربعين ليلي وليلي
وبس نلتقي ما تعرفيني
تصوري شوفك وما تخاويني
ووقت الي كنت عطشان
تبعتي المطر وما تسقيني
وتجي عالصبح مع قطر الندى
ولا تزوريني
ووقت الي عاتبك....
بنظرة غضب... تطلعي فيني

*********
تصوري

شوفك بيتي وكل العمر تسكنيني
و تمسكي أيدي وبالوفا بس تا تغويني
وقبل ما يتلامسو عيونا
تضحكي ومن الحلم توعيني
تصوري

*********

تصوري

لو بعدك معي
وكلما جعت ترقصي تا تتوجعي
ومن عنق زر الفل تشمي وما تشبعي
وقلك بحبك وانت يا قاسية ما تسمعي
وترميني....
فوق كتلة من الحنان
وومن عسل هالكرز بالوش تجرحيني
وتضلك.. كل العمر معي
وما تفارقيني

*******
تصوري...
لو اسمك معناتو بحر
وانا الي جاييكي العصر
قاعد على حفاف الدهر
وصافن انا فيكي ومشغول الفكر
ومتل حورية بحر تظهري وتفاجئيني
اما أنا... متل الي دايب بالسحر
الحقك بالريح... ومن حنانك
ما تحرميني
تصوري...