محمد قرفول: التنورة الضيّق خلقا (سهرة قرادة)
2020.09.24
بلوزة حنطية بعروق... بنية وضيق خلقا
والتنورة شلوق شلوق.... والجدولة محترقة
البلوزة بزرين زغار.... شعلتيلي قلبي بنار
خلي روحي كل نهار.... تمرق ع زهورك مرقة
والتنورة كتر الغنج.... شرشف عطر مخبا مرج
والضحكة عم تكرج كرج.... وتزيد بقلبي الحرقة
لبست تنورتها كلوش.... والعطر عليها مفلوش
لما الدنيي تكون دغوش.... من حدي بتمرق سرقة
نهداتي بعتا مكاتيب..... توديلك روحي وتجيب
تترديها عطر وطيب...... طبعتي شفافك عالورقة
بغفى بتجيني بالحلم..... من دون دستور ولا علم
بوعى، بيوعى عليي الظلم..... بتكويني بنار الفرقة
يا حلوة كيف بدو الشوق..... يتحمل شم ولا تدوق
شفافك عم بتنقط ذوق..... سقيني من شفافك شرقة
اللي قاهرني وزاد الهم..... قربا سم وبعدا سم
قلنا لما نحب الام..... البنت مناخدها بورقة!
لما الصبح عليكي يطل..... بيفتح منتور وفل
من قبالك ما فيي فل..... ولا فيي حدك (ابقى)
من مشاركة الشاعر محمد قرفول في سهرة الزجل الثلاثاء 22/9/2020 في ملتقى عمريت الثقافي.. سهرة قرادة