ثناء دبسي.. ست الكل وداعاً
2024.02.21
أمير يوسف علي
من لما كنت طالب بالمعهد العالي كان واحد من اهم احلامي اني اشتغل مع هي السيدة الجميلة والعظيمة.. كنت غار من كل الممثلين اللي اشتغلو معاها وبالاخص اللي كانو ياخدو دور اولادها.. لانو احساس الامومة والمحبة العالي اللي كان يملى بيوتنا لما تطلع عالشاشة كان استثنائي وكبير ومابشبه اي شي تاني.. وحالفني الحظ ببداياتي واشتغلت معها بمسلسل ردم الاساطير.. جمعني فيها مشهد واحد بس طويل.. المشهد كان باللغة الفرنسية وانا ماكنت اعرف ولا حرف بالفرنسي وكنت متوتر وملبك كتير.. ورغم انها ماكانت اخدة دور امي بالمسلسل ولكن مسكتني من ايدي متل طفلها الصغير ووقفت معي وهدتني وساعدتني وطلبت من المخرج الكبير هيثم حقي ناخد استراحة ساعتين وقعدت تعلمني وتدربني عالمشهد وعاللفظ الصح.. وخلال التصوير كانت تقلي انسى كل الناس وركز معي بس..
مسكت ايدي وصارت تنقلني الكلام جملة جملة وهيي عم تطلع فيي كأنها ام عم تمسك بإيد طفلها الصغير لتاخدو لبر الامان.. ومن هديك اللحظة لغاية اخر مرة شفتها فيها، ضلت علاقتنا هيك.. تبعتلي وتحكيني كل فترة.. اول مين يباركلي على اصغر لحظات النجاح واول مين يواسيني بأصعب لحظات التعب.. ضلت الام الحنون والقلب الكبير اللي كلمة منها بتنسيني كل مشاكل الدني وبتهون اصعب اللحظات.
وبعرف انو هيي كانت هيك واكتر مع الكل.. ماحدا قابلها ما حس بهالشعور.. ماحدا شافها حتى على التلفزيون ومادخلت قلبو وعقلو وحياتو..
سيدة راقية وام عظيمة وممثلة استثنائية ومدرسة بالعطاء والحب والفن.
شكرا كتير كبيرة الك من اول لحظة ولآخر العمر..
الله يرحم روحك الطاهرة ويصبر قلبنا كلنا على فراقك يا ست الكل
مواد ذات صلة
ثناء دبسي من الحفلات المدرسية ثم المسرح.. وأخيراً الخلود
https://feneks.net/art/drama/72076-2024-02-21-14-56-04